الفاجومى يفتح النار

– عادل حموده مخبر يعمل مع أكثر من جهاز أمنى واليكم حكايته مع فايزة سعد
– رئيس وزراء مصر وكيل لأعمال "الخرافى" رجل الأعمال الكويتى
– أنا أهلاوى والزمالك ما زال يبحث عن الصندوق الأسود
– قرارات الحكومة كلها ضد الشعب والناس "متيسة"
– دى مش حكومة . . ده تشكيل عصابى متكامل الأركان
– أن متفائل تفاؤل الشعراء الهبل

– فلسطين: لماذا أطلقت على نفسك اسم الفاجومى وما معناها؟
– نجم: الناس هم الذين سموني الفاجومي، والفاجومي هو الشخص المتهور، الأحمق، الذى لا توجد عنده حسابات.
– فلسطين: وهل ينطبق هذا عليك.. أليست لديك حسابات؟
– نجم: لأ ماعنديش حسابات، ولن يكون عندي حسابات إطلاقاً.
– فلسطين: كيف تقول ذلك وأنت كذبت فى ندوتك فى معرض القاهرة للكتاب، وقلت إن رجل الأعمال نجيب ساويرس حملك على كتفيه فى احدى المظاهرات عندما كان شابا؟
– نجم: أنا كذبت ؟.. من قال هذا الكلام عاهر، وشرموط ولازم يكون على علاقة بحاجة من اثنين إما مباحث أمن الدولة أو الموساد.
– فلسطين: إذاً ما هي الحقيقة؟
– نجم: اسأل جميع من شهدوا الواقعة، اسأل التليفزيون عن سر قطع الإرسال أثناء كلمتى.. هل تنقلب الحقائق بهذا الشكل؟ دى خيانة.. دول جواسيس.. أنا لم أقل هذا.
– فلسطين: إذاً ما سر المعركة بينكم وبين الصحفي عادل حمودة ؟
– نجم: لا أعرف، ليس بيني وبين عادل حمودة معارك.. أنا الوحيد الذي وقفت بجوار عادل حمودة، وأعطيته مذكراتى "الفاجومي" ( المذكرات ) لينشرها في روزاليوسف.. والجميع يعرف أن هذه المذكرات رفعت أرقام توزيع روزاليوسف. فجأة قرر عادل حموده وقف نشر المذكرات، جاء في الأسبوع الأخير من نشرها وقال "انتهى الجزء الثاني" رغم أنه كان عنده 6 حلقات باقية لم ينشرها. ولم أتحدث. كل ما فعلته عندما نشرت الجزء الثاني في كتاب أنني قلت: وهنا أدرك شهر زاد السكات وأعلن أ.عادل حمودة انتهاء المذكرات. بعدها لقيته بيتريق على الجلابية بتاعتى، عادل حمودة بيتريق عليا، هذه هي المأساة. والمثل الشعبي يقول:
إذا أتت باض الحمام على الوتد
وإذا ولت بال الحمار على الأسد.
وهذا ما نحن فيه. أنا مش عارف عادل حمودة عامل شهيد ليه.. ده هو ابن الحكومة المدلل، هو حاسس انه شهيد لأنهم سيبوه روزاليوسف. الخزنة اللى ملهاش فواتير.. المسألة بالنسبة له ليست كتابة. ليست صحافة.. المسألة أنه تذوق طعم "الأبيج" (بضم الباء وتعنى الجنيه بالدارجة المصرية) بتاع روزاليوسف.
– فلسطين: وموضوع نجيب ساويرس؟
– نجم: كل ما قلته انه إذا كانت الحركة الطلابية المصرية أنجبت أمثال ساويرس فهذا جيد.. وهذا هو رأيى. أليس من يحضرون الأموال من الخارج لتشغيلها داخل مصر أحسن من المهربين؟ أيهما أفضل ساويرس أم الفايد؟ المسألة أن هناك قاعدة ليس عليها إلا ضرب البق. إيه شجاعة عادل حمودة إنه يشتم الجنزوري بعد تركه الوزارة؟ أنا كنت بشتم عبد الناصر وهو عايش.. ولما مات رثيته بقصيدة فريدة. هذه هي أخلاق الفروسية. مش أخلاق المخبرين. المخبريين لهم أخلاق ثانية خالص. عادل حمودة مخبر يعمل مع أكثر من جهاز أمني. وإليك اسم السيدة التى جندته.. فايزة سعد هي التي جندته وتزوجته.. أم أن الناس تنسى؟ مش عادل حمودة ده اللي سافر إسرائيل وظللنا نقرأ: "عادل حمودة يكتب لكم من تل أبيب"؟ إيه اللي حصل فجأ‎‎ة.. كيف أصبح عادل حمودة رجلاً وطنياً.. هل هو وزير الخارجية القادم ؟

يا سيدى المسألة مش كده خالص. المسائل كده تافهة ومسطحة. تعالوا نشوف ها نعمل إيه في اللى إحنا فيه تعالوا نتحاور مع بعض في ما نحن فيه. البلد بتتباع حتة حتة.. وخلاص معادش فيه خشا. برقع الحياة وقع وسقط. والبلد بتتنهب. لما يكون فيه قضايا زى دى.. تقول لى ساويرس وعادل حموده.. تبقى راجل مجنون وبتهرب. تعالوا نشوف البلد دى رايحة فين.. مش كده ولا إيه ؟ هوه الراجل اللى قتلوه فى بورسعيد.. مش كل الناس عارفة انه كان بيقدم مظلمة؟ يعنى نسيب ده كله. . ونسيب قانون الطوارئ المسلط علينا مش عايز يسقط ونسيب المهازل … قال لك فتحوا الصندوق الأسود لقوا مكتوب فيه نعم لمبارك … مش دي كوارث قومية.. يا راجل بلاش هبل.
– فلسطين: لماذا لم يأخذ نجم حظه من الدنيا؟
– نجم: مين قالك .. أنا واخد كل اللى أنا عايزه. أنا مبسوط كدة. اللى أنا فيه ده اختيارى ورهانى الصحيح. أنا لا أراهن على ملك أو رئيس أو نظام حكم.. أنا أراهن على الناس.. شوف كام وزير وملك و إمبراطور راحوا فى انهى داهية.. فى مزابل التاريخ كلهم. أنا أراهن على الناس.. وعايش حياتى.
– فلسطين: وكيف ترى حركة الشعر في مصر؟
– نجم: مفيش شعر في مصر.. اشمعنى الشعر.. هو فيه تعليم في مصر.. هو فيه سياسة في مصر؟ ويقول لك أزمة الأغنية.. أزمة الكورة.. أزمة.. أزمة.. طبعاً لازم يكون فيه أزمات.. دا البلد بتدار (بضم الباء) غلط.. واللى في مقاعد السلطة دول … دي مش حكومة دي عصابة.. تشكيل عصابي متكامل الأركان.. والسرقة بقت علني وعيني عينك. كل ما فعلته الحكومة ضد الناس والناس "متيسة" لأن القيادات الصحفية اللي صنعتها أجهزة الأمن زي عادل حمودة وغيره بيتكلموا عن الجلابية بتاعتى. شوف مين قاعد مطرح مصطفى النحاس‎.. عاطف عبيد.. عاطف عبيد ده بيشتغل وكيل لتاجر كويتي كبير أسمه الخرافي.. عاطف عبيد رئيس وزرائنا هو وكيل أعماله هنا .رئيس وزراء مصر وكيل أعماله تاجر كويتي له منافذ على إسرائيل.. إيه ده؟ وهو الأستاذ عادل حمودة مش عارف الحكاية دي ولا إيه؟ أنا مش فاهم.

– فلسطين: هل أنت تلميذ لأحد في الشعر ؟
– نجم: أنا ابن الشعب المصري.. أنا أبن أمى.. أمي هى إللي علمتني الكلام وطلعت قريت أعمامى وأسيادي بيرم وحداد وصلاح والمتنبي وصلاح عبد الصبور وأمل دنقل.. وأنا كان يعجبني عنترة من بين الشعراء لأنه كان أكثرهم وضوحاً.. وكان أشجعهم.
– فلسطين: وفؤاد حداد وصلاح جاهين؟
– نجم: فؤاد وصلاح وفؤاد قاعود كان شاعر كبير خالص ومحدش بيتكلم عنه خالص. وكان في حاجة إسمها زكي عمر شاعر الفلاحين بيقول عن أمه:
ماكانتش بتحب اللون الباهت
ماكانتش بتحب الميه الفاترة
وكانت لما بتكره تكره موت
ولما تحب بتحب صبابه
ولما بتحزن تبقى ربابة
ولما بتفرح يبقى الفرح على البوابة.

ده زكي عمر .. حد سمع عنه حاجة؟

– فلسطين: هناك شعراء تلمعهم (بضم التاء وكسر الميم) السلطة؟
– نجم: طبعاً.. صلاح جاهين كان لامع.. فؤاد حداد ماكانش لامع وهما الاثنين كبار قوي.. صلاح جاهين كان شاعر الثورة.. شاعر 52.
– فلسطين: ونجيب سرور؟
– نجم: نجيب شاعر وكاتب مسرحي ومخرج وممثل مسرحي عبقري، لكنه تم إهداره لأنه نزل الشارع ولم يتواءم مع المؤسسة.. لم يدخل كترس في الآلة.
– فلسطين: وعفيفي مطر؟
– نجم: علشان مكذبش عليك.. أنا معلوماتي عنه أنه شاعر كبي، لكن أنا حظى معاه وحش. كل ماجي أقراه ما أبقاش في مزاج كويس.. و علشان كدة مقدرش أحكم عليه.
– فلسطين: أنت أهلاوي؟
– نجم: آه.. أنا أهلاوي وبشجع الأهلي.. وأنا رأي إن الزمالك السنة دي بيدور على الصندوق الأسود. نادي الزمالك لازم يدار بشكل جيد لأن دي مؤسسة يملكها الشعب المصري. ولكن إشمعنى هي إللي ها تدار بشكل كويس.. يعني أنت رأيك أن الثقافة بسم الله ما شاء الله ؟
– فلسطين: من حسن حظ الأهلي أن لديه إدارة جيدة.
– نجم: طبعا. أزمة مصر أزمة إدارة مش أزمة كوادر.. الكوادر موجودة في كل مكان وفي كل مجال.. وجبابرة .
– فلسطين: يعني هل أزمة مصر أزمة إدارة؟
– نجم: طبعاً .. الناس إللي قاعدين على كراسي السلطة دي مش شغلتهم خالص، وبعدين.. أنا رأيي إننا نتكلم في موضوع مصر.. مش عادل حمودة.. لأن المشكلة لو إتحلت في مصر ها تتحل في الوطن كله.. مش ها يكون الأمريكان بالصلف ده.. مش ها يبقى اليهود بالإجرام ده كله.. لو المشكلة محلولة في مصر.. إديني إدارة رأسمالية نظيفة زي فرنسا.. أنا دلوقتي معنديش قدرة أركب السلطة.. ومعنديش كوادر.. بلاش نضحك على بعض.. هما اللي في السلطة.. بس يدونا إدارة نظيفة.. إديني إدارة بني آدمين ويسرقوا برضه.. هو إحنا ها نقعد نحرسهم.. لأ طبعاً.. يسرقوا برضه بس يبقوا بني آدمين. بس يبقى عارف إن هو رئيس مصر، أو رئيس وزراء مصر، أو وزير خارجية مصر. الحكومة التي يحدث لرعاياها ما حدث في الكويت وبعدين يطلع البيان الرسمي يقول إن إحنا شعبين شقيقين.. دي تبقى عهر وقواده.. شقيقين إزاي؟ طب مين إدى الشقيق التاني الحق إنه يقتلني..

هل يقتل الأشقاء بعضهم؟ ويضعوهم في معتقلات فى الصحراء؟ دول ناس رايحين ياكلوا عيش.. والحكومة تقول ماحصلش حاجة.. وربما يكون أ. عاطف عبيد كان قاعد في نفس الليلة مع الخرافي إللي مشغله وقاعدين يتعشوا سوا.

– فلسطين: ما رأيك في طريقة إدارة الحكومة المصرية لأزمة الطيارة؟
– نجم: همه أداروا حاجة.. إدارة بأمارة إيه؟ هل نشروا أسماء الشهداء؟ همه عرفوا لغاية دلوقتي إيه اللي حصل؟ ايه التهريج ده؟ و ازاي كل إذاعات وتليفزيونات ووكالات أنباء العالم تذيع إن الطيارة كان فيها عسكريين مصريين والتليفزيون والإعلام الرسمي ما يذيعش إلا بعد 3 أيام.. ليه؟ عايز أفهم ليه عملوا كده . هوه ده يبقى إعلام محترم؟ هيه دى تبقى حكومة محترمة؟ حاجات صغيرة توضح لك إن همه كده.. أصلهم زى الجراد الأصفر.. سحابة جراد أصفر معادية ها تنقشع بإذن الله وتروح فى ستين داهية.
– فلسطين: امتى تنقشع يا عم نجم؟
– نجم: إيدى على كتفك … بس أنا متفائل تفاؤل الشعراء الهبل.. تفاؤل أهبل.. أنا حاسس إن هذه الغيمة ماشية رايحة فى داهية قريب وإن الشمس ها تطلع على مصر تانى.
– فلسطين: نعود إلى ..
– نجم: انت وجعت دماغى ..
– فلسطين: علاقتك بالمرحوم الشيخ إمام..
– نجم: علاقتى بالشيخ إمام علاقة عظيمة.. اثنين حبوا مصر والاثنين موهوبين وسخروا موهبتهم لهذه الحدوته. أما ما بينى وبينه من علاقة خاصة فهذا يهمنا نحن الاثنين وأنا وحدى لى الحق أقول عنها وقت ما أحب أو ما أقولهاش خالص.
– فلسطين: نحترم رغبتك فى الحفاظ على هذه الخصوصية.
– نجم: الشيخ إمام كان الفنان الأول فى مصر الذى اعتقل بتهمة التأليف الموسيقى وقدم للمحاكمة العسكرية. وهذا شرف عظيم.
– فلسطين: وأين نجم بعد الشيخ إمام ؟
– نجم: قيثارتى انكسرت.
– فلسطين: كنت تدعونا للأمل قبل قليل كيف انكسرت قيثارتك؟
– نجم: أنا أتكلم من خلال أدوات أخرى.. لكن لم يعد هناك الشيخ إمام. لم يعد ينفع أن أكتب أغنية ليلحنها الشيخ إمام. كنا بنعمل أغانينا كرد فعل مباشر للحدث..
– فلسطين: أنت اتجهت لبيع كلماتك للمطربين؟
– نجم: هذا التشبيه خاطئ ووقح.. أنا لا أكتب لأحد.. هم يقرأون ما أكتب وعندما يعجبهم ويريدون غناؤه فما المانع من حصولى على حقى؟
– فلسطين: ولو طلب منك أحد أن تكتب له خصيصا؟
– نجم: لا.. لن أكتب.. أكتب خصيصا فى أحوال معينة.. لو جانى سيناريو مسلسل مثلا.. أقرأ السيناريو كله علشان أكتب التتر والنهاية.
– فلسطين: ايه رأيك فى ناس حوش آدم وناس مساكن الزلزال؟ (حوش آدم هى المنطقة التى كان يسكنها نجم سابقا).
– نجم: حوش آدم كانت روح مصر.. وجدان الناس وطيابتهم.. ونضافتهم ونزاه هتهم.. فقرهم وخفة دمهم وحنيتهم ورذالتهم.. أما الناس هنا لسه ماحصلش تجانس بينهم.. لأن هذه المنطقة جديدة.. وعلى فكرة هذه المنطقة ليس بها لا مستشفى ولا مطافئ ولا حديقة ولا فرن ولا مركز شباب مع إن إحنا عددنا مليون.. الله يخرب بيوتهم … الحرامية بتوع مصر.. ما يعملوا لنا شوية حاجات هنا.. ده جنان اللى بيحصل ده.. محدش فيهم عارف ييجى يبنى مستشفى هنا.. ولا مركز شباب. طيب يأخذوا أجازه من السرقة أسبوع.. أسبوع واحد فى السنة فقط.. أنا الأول كنت بطالب بشهر دلوقت بقول ما يسرقوش أسبوع وبالفلوس دى يفتحوا مستشفيات للناس.
– فلسطين: ليه الناس ما تتحركش تطالب بحقها؟
– نجم: الناس دى يا أشرف طول النهار بتجرى فى الشوارع علشان يلحقوا الميكروباص.. زى النحلة والطاحونة.. والفتوة اللى يقدر يجيب العشاء آخر النهار.. هى دى حالة الناس. إدينى بقى عقلك.. وإن قعد فى البيت يطلع له التليفزيون.. يطلعوا له الشراميط بتوع التليفزيون.. يلزقوه فى الأرض.. والإعلانات بقى.. والعيال تقول لك عايزين من ده.. دى حالة حرب‎.. دول بيحاربونا.. وبالمناسبة أنا عايز أسأل الرؤساء العرب كلهم.. لو اتضح أن الموساد هى اللى عاملة عملية الطيارة المصرية.. مش ده يبقى عمل عسكرى ولا لأ‎‎‎؟
– فلسطين: وإيه السيناريو اللى انت متصوره عن العملية؟
– نجم: العملية دى عطلت برنامج القوات الجوية المصرية على الأقل 3 سنين.. الولاد كانوا جايين يقودوا المرحلة الجاية وعلشان تعوضهم انت محتاج 3 سنين على الأقل.. إزاى تحطوهم فى طيارة مدنية.. وإزاى تحطوا الكم ده كله مع بعض.. لماذا هذا الكم من الكوادر العسكرية المهمة يوضع فى طيارة مدنية.. من المسئول عن هذا.. مش على الأقل إن قواتنا المسلحة اللى عمالة تعمل النجم الأحمر والنجم الأبيض والنجم الساطع تبقى منظمة وفيها تنظيم وفكر.. لماذا لم يوضعوا فى طائرة عسكرية؟ أنا مش فاهم همه مستمرين ليه.. مش عارف الجرأة اللى عندهم دى جابوها منين.. الاستمرار فى استفزاز الناس ومشاعرهم حتى على مستوى الأكل والشرب‎‎‎‎.. لما راجل بالعافية يعشى عياله فول وطعمية ويبص يلاقى الإعلانات يعمل إيه.. ويقولك إدفع 17 ألف جنيه فقط واستلم عربية.. فقط إزاى يعنى.. ده السبعتاشر ألف دول علشان أوصل لآخرهم عايز شهر عد.. يبقى فقط دى ليه؟
– فلسطين: ووزارة الشباب فى التعديل الجديد؟
– نجم: والله وزارة الشباب دى لو وزعت بانجو على الشباب تبقى عملت حاجة حلوة. الشباب كله بيضرب بانجو.
– فلسطين: ليه الشباب بيضرب بانجو؟
– نجم: علشان مفيش حشيش.. ما هم مرة سألوا غاندى وقالوا له انت زعيم الأمة الهندية إزاى تركب القطر درجة ثالثة.. قال لهم علشان مفيش رابعة.