سبحان من يفهم دلالك

لوالتموا كل من

فى الحروف

أيفكوا

امبرتوا ومعاه اسم الورده

والمالكى وسيميائياته

وباشلار وبارت

وفوكو ابحفرياته

وبنكراد وكليطو

والترهونى ابحربه للرداءة

وانفعالاته

واحمد وتوهامياته

ويالا ايفكوا حرف واحد

من حروف جمالك

يللى سبحان من يفهم دلالك

+++

يابدر

لو تشع فى عيون الناس

كما عيونى

تظل الناس

من شرقها لغربها

تعشقك

من شمالها لجنوبها

تعشقك

سبحان من يفهم جمالك

ويكتب احروف فى دلالك

+++

انا قلت فى كل لحظة

لابد نصبح فى هالتك

لأنه

كل ما لفالى نورك

انحس بيه

انحس ابخطواتك

نعرف خطواتك

نعرف الفوضى اللى اتجى

امعا احضورك

تنهد دنيا

اتحرك سحابات

اتميد اجبال

اتصير زلازل

تغضب براكين

يابنت مالك مثيل فى عيونى

سبحان من يفهم جمالك

ويكتب احروف فى دلالك

+++

نعرفك من زمااااااان

مش ممكن اتكونى انسان

قصدى

انت عصفور من الجنة

مرسوله من جان

انت بستان

انت احلى من اى ورد

اعطر من اى ريحان

سبحان من يفهم جمالك

ويكتب احروف فى دلالك

+++

لو اتشوفى يا بدر

كيف انت فى هالدنيا

لو ايجى مخرج فهيم

من هوليود

والا حتى من ابلاد الهنود

يسرقوا بالزوم..

بس... احضورك

واتجى من نفسك

اتشوفى نفسك

يابنت نادر مثيلك

لابد تعشقى روحك

كما عشق الناس

واتحيرى فى رسمك

كما حيرة الناس

سبحان من يفهم جمالك

ويكتب احروف فى دلالك

+++

لوريتى يا بدر

يوم احضورك

ماريت طوله

ما له مثيل

يا بنت حتى صباحاتك ندا

صباحاتك حنه

صباحاتك الهن

طعم المحنة

كيف اخلقت

كيف اصورت

سبحان من يفهم جمالك

ويكتب احروف فى دلالك

+++

اتريدى رسام سريالى

يحلم ويجيبك من احلامه

رسام ابعد من دالى

اللى ابريشته ..وغروره

ينحنى

وتكبرى على احلامه

وتعجز ريشاته

يحفرن فى اللوحة

ما يقدرن يوصلن

التفاصيل عيونك

كيف لون البحر

كي الفيروز

حاجة ما تسمى

حاجة فى اللغة ما لها ملمة

تبى احروف ما ينعرفن

ولا اوردن حتى بالاشارة

و رسام تبى

ابعد من دافنشى

وبيكاسو بأكعابه

وانجلو وحيطاته

والوان كنيسته

ولعب الوانه

يا بنت مالك مثيل

لا يجيبك رسام دليل

اتحير فيك الريشة والقلم

اتحير ابحور الروم

ومحيط الظلم

ما مر مثيلك

فى التاريخ

سبحان من يفهم دلالك

ويرسم الحروف فى جمالك

+++

لا حكا عنك هيرودوت

ولا زيدان

ولا انظنى مريتى

عالجبرتى

ولا انظنى اتمرى بعد زما ن

ولا مريتى من زمان

لا عند بن خلدون

ولابن زيدون

ولا المسعودى

ولا جابك رحالة فى اوصافه

ولا مريتى على بطوطة

فى جولاته

ياما اوصفوا

وياما قالوا

مثيلك يا بنت ما لقوا

ولا المراسى جمالك لفوا

سبحان من يفهم جمالك

ويكتب احروف فى دلالك

فى التاريخ على ما قريت

من عهود لغريق

لعهود بيزنطة

للبنت اللى دوخت تاج روما

وايقولولها كليوباترا

هيه.. هيه.. يا كليوباترا

يا مدوخة العروش

يا جاره لباطرة عند اقدامك

يا من غيرت حكايم

يا من حارت فيك روما

وضجت من دلالك

وشغلت الدنيا

اسرعى.. تعالى

فيه من هى اكبر من اوصافك

فيه من هى اوسع من جمالك

فيه من دلالها فايق

يغوى دلالك

لا عاد تـنذكرى ..

ولا عاد تنزارى..

ولا عاد تلعب الذاكرة

فى زمانك

ولا عاد مرمرك يلمسه سايح

ولا ايصور تالاه ذكرى

تعالى واقرى

و جيبى من كواهنك

من يقدر يكتب احروف فى دلالها

اللى .. سبحان من يفهم جمالها

+++

يا بنت

بإختصار

يفهمك اللى خالقك..

من صورك وابدع فى دلالك

صامت انا من زمان

فى اهوالك

صامت انا من زمان

انجل جمالك

صامت انا

دينك فى ذمتى كرمه الجنانك

يكفينى هناك

مش ضرورى امعايا

حتى امعا مبغاك

مانى انانى

ولا فى حبك دانى

لكن يا بنت لازم تفهمى

قصتى عجيبه فى مجالك

لا اتعود فى تاريخ

ولا تنكتب فى صفاحى

انتعزى فيك باقلامى

وعهدا ما ايجى غيرك

فى احلامى

لكن مازلت حاير

وسبحان من

يفهم جمالك

اللى ايحير كل ريشة فى دلالك

+++

انت اخرى بإختصار

حلمى وشعورى

لكن مفصول

عن حلمك وشعورك!!

حلمى ملكى

انت يمكن تقترنى

يمكن تاخذك مداين

ويمكن.. يمكن ترحلى فى بحور

لكن

اللى عندى من حلم وشعور

ايريحنى

انك ما تقدرى تبيعى فيه

ولا تشريه

ما تقدرى تلغيه

امريحنى هالشعور

من اسنين وشهور

انت يمكن عندك فارس

ياخذك ..يرحل بيك

لكن يا بنت امريحنى

انه حلمى وشعورى

ما يقدر يصيدهن فارس

ولاما زال اخلقلهن فارس

وما انظنى يقدر عليهن فارس

انت يمكن ايجيك

من يقترن بيك

واتحبيه

لكن حلمى امريحنى

انك لا تقدرى اتبيعيه

ولا تشرى فيه

ولا يقدر واحد يعقد قرانه عليه

وبإختصار

سبحان من يفهم دلالك

ويكتب احروف فى جمالـك