الأربعاء ٥ أيلول (سبتمبر) ٢٠٠٧
بقلم صالح اهضير

ممّا غولة دارت خبلة!!!

ممّا غولة دارت خبلة.. (1)
فزمان المحنة بانت عيوب..
ممّا غولة ولدات غوال..
هاجت هيجة.. نهبات جيوب..
* * * *
 
ممّا غولة هيشة تخلع !
فمها محلول ديما يبلع !
كيف لبحر إلى هاج..
بجْبال عالية ملمواج..
هذا شاري..هذا بايع..
وهذا محروم حقو ضايع..
* * * *
 
ممّا غولة شعلتي نار..
ضاعت الأحلام وخلات الدار..
الخبز الحافي ما يعافي..
هذا عيب..هذا عار!
واش هاذي معيشة تكفي؟!
* * * *
 
ممّا غولة احبابها شلا ّ..
مدى منهم مشى وخلا ّ..
شحال من قصور وضيعات!
وشحال من عرايص وجنات !
واسوار بناها وعلا ..ّ
* * * *
 
شوف المقهور فبرّاكة..
شحال يقدّو من درهم!
باش يفرشها ويتراكة..
تايه مغلوب..لا حركة..
عايش مسكين بالبَرَكة..
والله يجيب اللي يفهم !
* * * *
صحاب الحال قالوا مكتوب..
والمكتاب ماعليه هروب..
هاذي حملة زيرو لحزام..
بلا تفكير وبلا تخمام..
* * * *
 
زادوا قالوا لازم تختار..
هاذ الدنيا شان وشان..
هكذا قالوا ناس زمان..
هذا رخيص هذا غالي..
اللي باين ما فيه اسرار..
* * * *
 
عشقات قلوب مالت ميلة..
لكن هاذ العين بصيرة..
واليد مغلولة وقصيرة..
والعيشة حارة وذليلة..
ربي غالب ولا حيلة !!

(1) ممّا غولة : إشارة إلى الغلاء الفاحش الذي يستنزف جيوب الكادحين..


أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

فيسبوك منبر حر للثقافة والفكر والأدب
تويتر منبر حر للثقافة والفكر والأدب
الأعلى