يا مصر بيعي

مشاعري عبيدك ،، وببكي في عيدك

وريدي ووريدك ،، ما بينهم لحام

ناديني تلاقيني ،، قُصادك يا عيني

ولو قولتي فيني ،، أجيــلك قووام

يا مصر يا غالية ،، يا ساكتة وشايلة

ووقت المُحايلة ،، بتنسي الخصام

أنا أديكي روحي ،، يا فرحي وجروحي

لفين لو تروحي ،، في وسط الزحام

كرامتك كرامتي ،، يا رفعالي هامتي

يا غنوة في صمتي ،، جميلة المــقام

بييجوا عليكي ،، ويتحاموا فيكي

وتجري وإيديكي ،، بترمي السلام

ووقت سكوتهم ،، وخوفهم وموتهم

بتعلي بصوتهم ،، تقولي فـ كلام

ويتناسوا دورك ،، ويطفوا فـ نورك

وكُره يزورك ،، يزيد الآلام

وجرحك دا عيدهم ،، وصمتك يفيدهم

ويفضل يزيدهم ،، إهانة الكِرام

ووقت ضيقتهم ،، تلاقي طيبتهم

بتبني في بيتهم ،، بكُل إحترام

وهما اللي هانوا ،، وباعوا وخانوا

ولا مره صانوا ،، معاني الغرام

فيا مصر بيعي ،، عروبة ربيعي

ويا نخوة ضيعي ،، ما بين الأنام