صباح الخير

صباح الملكة والشغالات

بعد الحكاوي اللى إتحكت جوه الحانات

صباح مرايل مدارس ..

وبالطو ابيض وفارس ..

وطفل أخضر وطفلة .. مشتاقين للحضانات

صباح الخير

صباح الحنه على كفك يا فرحانه

صباح جميزه شقيانه وعرقانه

صباح الورد يا امى

صباح عَصفورُه بيغنى

صباح قصيده من المعاني شبعانه

صباح الخير

صباح الفضيلة يا طيب ويا راضى

صباح مظاليم حَن عليهم القاضي

صباح الجنه يا فقرا

صباح السمرا والشقرا

صباح النور على بكرا و ع الماضي

صباح الخير

صباح اللقمة اللى مقسومه

صباح الضحكة اللى مكتومه

صباح الضرب فِ المليان

صباح غُنا لكل أوان

صباح النصر لكل أمة مهمومه

صباح الخير