الأربعاء ٢٢ تموز (يوليو) ٢٠٠٩
بقلم علاء محارب

رباعيات صينية 5

وطنى رقيتك من السنين العجاف
ومن سنابل جوع ومن سواقى الجفاف
من الجراد اللى ف غيطانك عشّش
ومن رؤوس أينعت بتطاطى للسياف
وعجبى!

رباعيات صينية 6

قلبى نحتّك من حجر صوّان
وحلفت ما يمسّك لا إنس ولا جان
صحيت فى يوم ملقتكش فى جنبى
ولقيت مكانك حفرة ميت فدان
وعجبى!

رباعيات صينية 7

بدرى اتولدت يا ترى واللا جيت وخرى
ليلى اللى فارد جناحه واللا ده فجرى
أنا وزمانى اختلفنا وقعت ميت حىّ
مادريتش فين أولى ومنين أجيب أخرى
وعجبى!

رباعيات صينية 8

فى الحلبة طور هايج كما الإعصار
وعباية المتادور حمره بلون النار
جمهور غفير بيصيح عايزنها دم
وتيران كتير واقفة طابور انتظار
وعجبى!

أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى