الاثنين ١٥ آب (أغسطس) ٢٠١١
بقلم محمد سليمان

ابتهالات

لو هفتكر حالا
حياتي قبل هذا الوقت
مش هفتكر حاجة
ولو قلت إن من عادتي
أكون فرحان بكل الكون
هكون كداب
ولو إني
معشتش معنى لوجودي بهذا الشكل
غير لحظة ما قلت لنفسي : ليه لأه؟!!
ولم أهتم بالباقي
ولا تأويل مرور الوقت وياكي
بهذا الشكل
ولو هغلط ف نطق الإسم ميت مرة
فمش ذنبي
ده ذنب حروف بتتمنى تكون منك
أعتقد
ممكن أكون
بالغت جدا ف ابتهالي
جوا صومعة الكتابة
لما حبيت إني أخرج برّه أوضتي
و أرتمي ف حضن الحياة
أو أكون راهب بيحلم
كل ليلة بالملايكة يبشرُّوه
إنه صار قديس تماما زيهم
أو أكون
مجذوب زمانا منتظر
وصله بالعشق الإلهي
جوّا حضرة
قبل انتهائها و بثواني...
إطمئـَّـن
أو مجرد كوني طفل
حس مقدار السعادة ف عين بتبكي
بعد ما اتمنِّت بحرقة
إنه يحمل اسمها
لو هقول إني فاهم
كل فقرات القصيدة .....متصدقوش
الحقيقة
إني مش فاهم تماما
كل تفصيلة ف مشاعري
حابة تحتضن السطور
و تقول : بـــحــبــــــــك

ختمة

"كل القصايد قصاد عينيكي سكـــــــــات"

12-7-2011


أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى