الثلاثاء ١ تشرين الثاني (نوفمبر) ٢٠١١
بقلم منال درويش

عــابـر سبيــــــل...

مفتتح
صفرت يا قطر محطاته
تعبت من كتر الجري وراه
وانا باستناه
الحلم الفارد درعاته
ومراهن ع الكون بحياته
قطع المشوار
ما بين النسمة اللي مسافرة
والقلب الحالم بنهار
لجل ما توصل للشموسه
السارحة ف حضن النوار
صفرت يا قطر محطاته
وأنا عابر و سبيلي آهاته
باتمني الضحكة فِ دمعاته
ومسافر يبحث عن ذاته
مشتاق للحضن الجواني
عابر ، و دنيتي واخداني
بأخرج من عالم للتاني
سواح في بلاد الله
والخلق خلايق يتعدوا
وفِ هم المسافات بيباعدوا
وان توهت فِ سكتي ح يساعدوا
دي عجايب خلق الله
صفرت يا قطر محطاته
وأنا عابر وسبيلي آهاته
 
(1)
عابر سبيل ، مشوار طويل
والحلم متلفح بليل
والموت سكوت
و العتمة موت
والآهة تصرخ ألف ويل
فين السبيل ؟؟!
من غربة الليل الطويل
دقيت علي كل البيبان
مشتاق يا حلمي
يا اللي كان !!!
محفور علي كل الحيطان
صورة و آذان
واتسرسبت مني السنين
موال حزين
ما دريت ولا أعرف
هوه فين ؟!
يمكن يكون ؟!
يمكن يهون؟!
يمكن ما تنزل دمعتين
تطهر الليل م الأنين
لما أتخنق فيه الحنين
و أتلجم القلم الفصيح
مبقاش يصيح !!!
 
واتبعترت كل السكك طواحين
يا شاعر الناي والربابة
يا عاشق الناس الغلابة
المحرومين م الحلم والتفاريح
اللي بيوتهم من إزاز وصفيح
متشوقين للنسمة وسط الريح
اللي ساكنهم الألم تباريح
اللي عاشقهم السكات تسابيح
يا شاعر الناي والربابة ……
متلجمة يا شمعة المصابيح
 
(2)
عابر سبيل،
فِ محراب الهوى عابد
و الضي مالي العنين
و بالأيدين فارد ،
أمل فِ بكرة اللي جاي
ولسكته معاند
صلب الحديد لو لان
يمكن ح يتهاود
تصفي الشموس أو تغيب
عمره ما كان جاحد
يا درب يا مستحيل
مين يطرقك غيري
لو كنت قلب الليل
صابر علي ويلي
النهر متلون بخوف!!
والمية مش هيه
تِحمي في قلب الجوف
والسكة مطوية!!
لو قلت عاشر وشوف!!
الدنيا مش هيه !!
لو قلت سامح ألوف
قلبك ماهوش ليه!!
يا درب يا مكتوف
العين و النية،،
المركبة تاهت،
والرحلة منسية!!!
لو قلت جازف وعوم
و إنسي الأسى والهموم
راح ارتمي جواك
حرفين فٍ أغنية
تحيي أمل فيا
يا درب يا مكتوف
العين والنية!!
 
(3)
عابر سبيل، ميل
ورد السلام
فِ ايدية سنابل هَنَا
والثانية برج الحمام
ناسي هناك الضنى
عايش هِنا الأحلام
عشق النسيم طلعته
وبنوره عشت الغرام
عابر سبيل أنت ولا
حدوته وسط الكلام!
عابر ودق الوتر
صحي الندي فِ العنين
غازل جبين القمر
داوى الجراح بالحنين
يا شوق قصايد الغزل
يا لهفة العاشقين
لو ضاع فِ يوم الامل
نلاقيه في ضي العين
النيل علي طلعته
ميل و بيمسي
والبدر من فرحته
غنى وقال نفسي
اسمع صدي غنوته
ساعدني يا حسي
لجلن ما أعيش دنيته
وانسي تعب أمسي
والعين قصايد شعر
والقلب ليك شمعة
لو تتحرق الف يوم
تصفي علي دمعة
تحي خضار القلوب
وشمسك الطالعة
وانت يا عابرفي السبيل،
سلم ومد الايد
وعيونى ليك شايفة،
وكمان سامعة :)
 
(4)
عابر سبيل ،،
والاسم فارس م الخليل
الشمس تحضن ضحكته
و يدوب ف نوره الف ليل
فارس وسيفة من حجارة!!!
لؤلؤة ف حضن المحارة
عقلة صباع …….لكن جسور!!
بأيمانه يهزم ألف غاره
بينه وبين العتمة سور
لو زادت الأيام مرارة
عابر سبيل،،، والاسم فارس
والحلم ف عيونه،،
انتفاضه!!!
يعلموها ف المدارس
يعلموها للكبار!!
اللي عاشقين الحياة
متمرمغين ف الانكسار
متنعمين بسلام خراف
مكسي بذل ف قلب عار!!
الاسم فارس من هناك
عاشق ترابك
يا وطن ،،، قلبه فداك
هز الولا
قلب الندي
لما ابتدي
يرمي الحجر
ويقول بصوته الي انكسر
الله أكبر ..يا بشر
امتي الامان راح ينتصر ؟؟!!
امتي الامان راح ينتصر ؟؟!!
وقع الولا
فوق التراب
بَل الثري
والغدر متلون بشوش !!
فرحان بكل اللي جري !!
والذل بيطاطي الوشوش
أدي اللي باع واللي اشتري
عابر سبيل،،
والاسم فارس م الخليل
 
(5)
عابر سبيل ،،
سال السؤال ،، و اترد له تاني
ازاي تكون شمس الربيع ،،
وتضيع ف أحزاني؟!!
أزاي تكون نهر الوفا ،،
وتعيش لي وحداني ؟!!
ازاي تكون نبع الصفا ،،
وتقول لي إنساني ؟!!
قلبك دهب
شاف العجب
ح يعود ويلقاني
مهما الغروب ، دوب قلوب
السكة عرفاني
النور طريقي ودنيتي
والشمس عنواني …!!
عابر سبيل ،،
شايل ما بين كفك حنين
جايز يكون النور ضنين !!
جايز يكون الحلم اكبر م السنين
جايز يكون المنتهي ،،محتاج ايدين!!
لكنها دنيـــــــا …!!
عاشقة عيون السهرانين
دايبة ف دموع الحيرانين !
يمكن وسرقاني …!!
لكنها دنيـــــــا ….!!!
وملونة توبها بلون الليل ساعات
وساعاات كتير لون الاهات !!
وساعات مع ضحكة وليد
تنسي همومك واللي فات !!
وساعات تلاقي حضنها
حضن الورود …!!
 
تفرح بلمسة منها ،،
وبعطرها تنزع الخوف
اللي ساكن والجمود…!!
تقوم ف قلب الشوك تفوت
لا يهمك الشط البعيد
ولا يمنعك حرس الحدود …!!
لإنها دنيــــــــا.....!!
وانت يا عابر ف الجراح
يا واصل الجاي باللي راح
أطلق لقلبك مية سراح
فك الأسير ..!
خليه يطير
يكسر الخوف والدموع
ويقيد مع الأحلام شموع …!!
يبقي يا عابر ف الجراح
ابدا ما عمرك يوم تضييع ..!!
 
(6)
عابر سبيل ،
سال السؤال السكة فين؟؟
نفس السؤال ، لما اتسأل كان من سنين
لما السكات طّوق راقبينا وعذبنا الانين
والورد شاب قبل الاوان ،
والحلم مكسور الجبين
نفس السؤال لما اتسأل
اتسرسبت احلامى منى
والوجع خنق العنين
نفسي ارتوى واشرب نهار
واهدم جبل عتمة ومرار
بس الاجابة فينها اصحى ودلنى
لجلن ما ازرع بالامان حلم الصغار !!
 
قولها بقى ،!!
راح اقول أمين
وارفع ايديه للسما
واناجي رب العالمين
يا رب صحصح قلبنا
وزيد عليه حبة يقين
النصر آتى وحلمنا
محفور فِ شريان الجبين
راح اقول أمين
وانتم كمان قولوا أأأأأأأأأمين
وانا اللي عابر فِ قلوب الصالحين
وسبيلي حبة من ايمان ومعاه يقين....
راح اقول آآآآآمين 
 
(7)
عابر سبيل،
عدى على مصر الأبية
وقالها:
وحشانى يا سمرة يا وش السعد
يا حضن الدفى في عز الشتا والبرد ،
يا قلبي اللي داب فِ هواكِ يا غالية
ليه الجفا والصد ؟!!
ده انا اللي عاشق ترابك ،
وغيرك عينى ما شافت حد ،،
مشتاق انا على بابك،
مستنى منك رد ..!!
يا ام الدهب الابيض وشجر التوت
يا صابرة فوق المحن،
قلبك عـفـى وبيفوت
لا يخاف من الايام ولا يخشى ابداً موت
يا مدوبة العشا
ق فِ حبك دوب
قلبي فِ هواكِ شاب يا سكة المكتوب
دقى بيبان السعد يا حرة،
يا شمس بكرة ،
فرحي قلبي اللي عاش مكروب
وانا في هواكِ عابر ح اعيش غالب ،
وعمرى ما أكون مغلوب 
وعمري ما أكون مغلوب 
 
(8)
عابر سبيل ، لما رجع قال: كلمتين
صحوا الامانى فِ دنيتى،
زادوا الحنين وقال لي يا صاحبي :
نسيت اني عيشته حقيقة وخيال
وهمه ف قلبي بتقل الجبال
نسيت انه امي وابويا وصحابي
ولو عيشت غيره دة هوا المحال
نسيت ان كحلة عنينة… ترابه!!!!
ودمعة وليده تبًكي الهلال
نسيت ان نيله بيجري ف دمي
وكلمة بحبه تهز الرجال
ولو عيشت غيره ح يبقي الممات
ولو شفت غيرة يكون ذكريات
تِدوب اسايا و تحي ضميري
تصحي دمايا …..ما تخضع لغيري
بحبه قصيدة و رسمه وكتاب
بحبه محمد وعايشة ودياب
بحبة حقيقة …..بحبه سراب
بحبه في صفحة وأعيشه كتاب!!!!!!
وانا العابر سبيله،
بابوس التراب،
فبيزيد حنينى، يهون الاغتراب .
وارجعله تانى بشعر وأغانى
واكتب نشيد في الهوى والعذاب ....

أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى