اتبرمجنا

، بقلم حمدي كوكب

اتبرمجنا

بس كفاية

كُتر النقد

خلّى دماغنا

فيها غلّاية

اتبرمجنا

من الأرضية

ومن قناة أخرى فضائية

ومـ الأولى والمصرية

ومن قنوات مليانة مِلاغية

اتبرمجنا

بيرم التونسي

قالها ياناس

دماغنا وجعنا

اتبرمجنا

وعرفنا المعنى

إنه الريس يبقى تبعنا

مش نديله صوتنا يبيعنا

احنا اتعبنا

لحد مـ جبنا

قطر الثورة

عشان يسعفنا

اتبرمجنا

وخدنا فـ بالنا

آدي قنواتنا

بتبلبلنا

وبتنسفنا

مش بتساعد

وبتنصفنا

اتبرمجنا

عـ التلفيق

سواءً لمـ...أو لشـ

كله فـ إيده دليل توثيق

وفـ الآخر بندعي بالتوفيق

اتبرمجنا

في كل بيوتنا

بنشوف برامجنا

ابتقنعنا

إنها أحلى رفيق

بعد الفاصل

إعلان فاشل

إعلام بيبيع

أي صديق

بعنا وعدنا

وأهلاً بيكم

في اتبرمجنا


حمدي كوكب

شاعر وقاص مصري

من نفس المؤلف