(نداء إنساني)
الحب بكي
والعيال سوس بينهش في العروش
والعروسة طالعة تنشر
زينة سينينها
مسروقة زي الجذور
عمرها سبع تلاف وشوية سنين
سمرة وبيضة وقمحاوية
ونيلها زيي أخضر فطيس
نازل بكى
وطالع بكى
ودمع عينه زي ليله
ما لوهشي عتمة
لابس أساور منهوشة
والجلد مسروق يعملولهم منه توهة
والتوهة ماشية من سنين
وعمري ضايع في الموالد
والجوامع والكنايس
يا ولاد الحلال حبيبتي تايهه من سنين
لابسة لبسي
لونها لوني
والناس شافوها
ما بيعرفوها
وهي دايرة
والأرض ماشية
وأنا في توهة
ساعات أضم إيدي لجسمها
والجوبرد
تديك دفى
ولما خوفي
أضم صدري لصدرها
ناعمة
وعريانة من كتر اللقا
تجوع تاكل لحمها
تشوفك
يغطيك جلدها
تصرخ بصوتي
وصوتي يعلي
أنا تااااااااااااايه
وهي تايهه
واخده خابط
مجعوص وظابط
ماشي يسكر
وأصله عسكر
يخطف عينيه
وهيه تايهه
والتوهه ماشيه
شوقها ضفاير
وريش نعام
جوه محافظ لصوص زمان
تيجي نسكر
ونلبس شارات
نضرب ونحكم صعاليك حارات
يمكن ألاقي حبيبتي تايهه
سكرانه يمكن
تمد إيدها
من خيرها تشحت
أوحتي تسرق
جوه الحارات
(بداية التوهة)
واقف لحالي
وفي راسي بكا
أحبك!
تغرق هدومي من دمك
أنسى عزايا في موت أخويا
وأرجع أحبك
هدومي تنزل من جوه خوفي
تستريني؟
أستريني!
يمكن أحبك تاني
واستني لحالي
وراسي تبكي
والبكا واقف
يمكن يلاقي جوه جسمك
قلب ليا
ولا هدمة تستر عيالي
من ضلمة الليل
وعيونك همومك
تغرس في جلدي
شوك وبرد
هغني
واشرب دمع عينك وهاقول و أرتل
يا ناس بغني
حد سامع
إنت سامع
بلدنا فين
وإيه يوصل لفين
إحنا فين
إحنا لسه جنب نيلك
ولا المراكب تايهة زيي
مين يا ناس لسه شايل جوه راسه
عقل صاحي
إنت تايه
وهيه تايهه
مين ياخدني
دي مش بلد
دي مش مساكن
دي مدافن للي عايز قبر صاحي
ولا المدافن تايهه برضه
والحانوتي عايزله جايزه
يمكن يقول لكل واحد يركبله قطر
يوصل لقبر
والقبر ما لوش بلد
يركب مراكب
ولا يتوه
هيغني زيي
ويقول يا توهه
الخميس ٦ تشرين الثاني (نوفمبر) ٢٠٠٨
