الخميس ١٣ كانون الثاني (يناير) ٢٠١١
بقلم محمد حسن عامر

روبابـــكيا

(جوا نفسه)
روبابكيا..روبابكيا
(أحلام قديمة للبيع
ولا أقولك
ببلاش)
نكسة القلب
مينفعهاش
استنزاف
خوف..خوف ..خوف
بتخاف
مع ان حلمك باين للكل
مش عارف تداري عينيك
قلمك شفاف
كل حرف ناوي تشبكه
باين جوا أنبوبة الحبر
فضحاك ضحتك
يخربيتك
الضحكة اللي بحد
اللي من القلب
بتحرك فيها كل عضلات وشك
لفوق
فوق بقى ...فوق
متقولش دي دموع الفرحة
دي دموع سارحة
ف شوارع ضيق النفس
اللي بيجيلك لما تحس
انك وحدك
رغم انك رامي
كلامك
ف حضن
آلاف
.................
(هو)
يووووه..اسكت بقى
صدعتني
اهرب منك فين
بيعني ف أي حته والسلام
وملكش دعوه
أنا راضي اندفن
من غير كفن
راضي أموت وجوايا
إحساس النشوة
إن عملت حاجة بجد
حاجة لحد
ارميني كلي على بعضي
وسيب تراب الناس
يدوسني
يفعصني
يخلي شراييني
نازفة وبس
عاوز اتصفي من أوهامي
ومن أفكاري
ومتنقلوش ليا دم من حد تاني
اصل فصيلة فكري نادرة أوي
.......................
(جوا نفسه)
يادي الغرور اللي صيبك
الجحور اللي مخبي فيها فكرك
انهدت خلاص
كلتها أفكارك انك عاوز تبقى
وبس
حس بقى يابني حس
مش هتبقى عبقري من الكلام
ومن الصور
ومن ترتيب الزمن
وترتيب المكان
أنت زي مانت طفل
هتتعلم المشي غصب عنك
ومتحولش تجري
من أول دقيقة
نزلت فيها
وبتصرخ للحياة
واء ..واء..واء
..........................
(هو)
لأ...لأ ...لأ
أنت ليه فاهم انك أنت اصح مني
ده أنت حتى متداري جوايا
ومش جوايا بس
لا وسط الخبايا
اللي صعب أقول لحد غيرك
مين أنا
بارع ف التمثيل
وساعات برضى بدور الكومبارس
علشان بس مجرد أشوف
أخر مطاف اللي خاف
يبقى البطل
وهل خوفه ده
حذر
ولا حلم كبير وانكسر
.....................
(جوا نفسه)
هـ هـ هـ هـ
تصدق ضحت من جواك
غصب عني
وشكل الروايات الزايفة
اللي تملي بترسم نفسك فيها
حتى هي كمان
خايفة
تطلع بيها من جواك
علشان عارفه
انك بس مجرد واحد
فاكر نفسه
فنان
.................
(هو )
أنا فنان غصب عنك
بص... شوف
اقدر أبكيك.. اقدر أضحكك من جواك
استنى بس اسمعني
أديني الفرصة
...............
(جوا نفسه)
بس بسرعة اصل تعبت
نفسي أنام شوية جوا منك
تاعبني معاك دايما كده
دي غلطتي إن أخترك من البداية
تكون اقرب صديق ليا
والله دي غلطتي
ومحدش هلومه
ها يا سيدي سمعني
...............................
(هو)
استناني بس البس لبس الشخصية
هتكلم عن ديكتاتور
بيقول
( نفذوا حكم الإعدام على كل الخونة
1:لكن يا سيدي من هؤلاء أبيك وعمك
---والأمر واضح كل الخونة
2: لكن منهم كلوديا حبيبتك
--قلت الأمر واضح كل الخونة
3:لكن يا مولاي لن يتبقى لك احد
--يبدو انه يجب أن افعل كل شئ بنفسي
احضروا لي سيفا
أتعلمون أيها الخونه
أن منكم أبي وعمي
و حبيبتي
ولكن العدل ف المملكة سواء
وكل خائن
يجب أن ينال العقوبة
وسأبدأ بأقرب الناس أليا
...................................
(جوا نفسه)
هتعمل إيه يمجنون
هتعمل إيه
..............................
(هو)
هقتلك

أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى