الأربعاء ١٤ كانون الأول (ديسمبر) ٢٠١١ بقلم
أم بليه ناشط سياسي
شركة أفراح ودموع الشعب .. تقدم فيلم .. أم بليه ناشط سياسي .. تأليف وإخراج وتمثيل.. ناس بتحب أم بليه .. تدور الأحداث حول أم بليه بائعة السندوتشات الجالسة في ميدان التحرير حيث تحاورها مذيعة تليفزيونية في برنامج هو في إيه؟ ... ويبدأ الحوار بسؤال المذيعة:
أم بليه سيدة مكافحة جاءت لميدان التحرير بائعة سندوتشات فأصبحت ناشط سياسي.. أم بليه.. إيه حكايتك؟
أنا ناشط سياسي غصب عن أي حد .. هو في إيه كل واحد ييجي يتمألس عليا عشان أنا ست مكسورة الجناح .. بصي يا اختى مش عيب إني أكون من بتوع السياسة وبياعة سندوتشات فول وطعمية الشغل مش عيب؟
كلامك مظبوط يا أم بليه لكن إحنا عايزين نعرف إيه النشاط السياسي اللى انت بتعمليه؟
الله ما طولك يا روح هو قعدتي وخدمتى للي قاعدين في الميدان دول مش خدمة للبلد يعنى انا باخدم الشعب يعنى انا ولمؤاخذة ناشط زيهم.. ماهو كل من هب ودب بيطلع في التليفزيون ويقول أنا ناشط سياسي.. على الاقل أنا صاحيه نايمه في الميدان المدعوأ ده .. هى جت على اللى زيى..!!
أنا قصدي إيه العمل السياسي اللي انت بتمارسيه في الميدان؟
استغفر الله العظيم نقول طور يقولوا احلبوه... يا ست المذيعة افهمي.. بصي أنا حأنزل لمستواكي واشرحلك.. أنا بعد ما باخلص بيع السندوتشات بفرش ملايا علي الارض وألم كل الستات البياعين اللي في الميدان واقولهم قولوا معايا الشعب يريد تغيير النظام وإحنا بنتنطط نشاط بقى!!
ما هو النظام اتغير خلاص يا ست أم بليه؟
وماله يا اختى ما احنا لازما نجدد أول بأول.. وبعدين بينى وبينك القعده في الميدان مريحة خالص.
إزاي؟
الشغل فيه علي ودنه والواحدة مننا مش ملاحقة.. وبعدين لا في بلدية تجري وراكي ولا شرطة تديكي على قفاكي وتأكل السندوتشات.. هأهأهأهأ.
طب يا ست أم بليه انت ظروفك الاجتماعية إيه؟
متطلقة تلت مرات في وش العدو؟
آآآآآآآه يعنى ما ينفعش ترجعي لجوزك؟
جوزي مين فيهم؟
انت مش بتقولي متطلقة تلت مرات؟
آه من تلت رجاله.. المنيلين طلعوا مش وش نعمه ده أنا كنت مهنياهم..سيبيكى انت ما فيش احسن من العزوبية وتربية العيال؟
هو انت عندك عيال؟
سبعة وبأجري علي اتنين؟
مش فاهمة؟
لأ فوقي معايا خدي سندوتش الفول ده واصحي كده...أنا عندي اتنين في المدارس بأربيهم وخمس سريحه كلهم خرجوا من التعليم؟
طب ليه تخرجيهم من التعليم؟
كل ما أودي واحد فيهم المدرسة يهرب من فوق السور؟
وعملتي إيه؟
قرفت بعيد عنك .. خدت الفرشة بتاعتى وقعدت بالسندوتشات جنب السور.
وبعدين!! حرموا يهربوا من فوق السور؟
حرموا إيه يا ختي د ه انا شوفت بلاوي من السور ده؟
شوفتي إيه يا أم بليه؟
في سرك... واللا في سرك ليه ما خلاص كل شئ انكشف وبان.. الحكاية طلعت إيه يا اختى مش هم لوحدهم اللي بيزوغوا من التعليم ده طلع كما المدرسين بيزوغوا عشان يروحوا لقطوا رزقهم... (تمصمص بشفاتيها) فين تعليم زمان ومدرسين زمان؟
هو انت دخلتي مدارس يا ست أم بليه؟
بعد الشر.. أنا دخلت الكُتاب وما كملتش .. أصلي أهلي كانوا ناس غلابة .. والعين بصيرة واليد قصيرة.. بس أنا ورا الواد بليه الميكانيكي وشلاطه الكهربائي لازم اعلمهم إنشا الله افضل ناشط سياسي علي طول؟
إن شاء الله يا أم بليه ربنا يديلك الصحة .. لينا سؤالين ونختم حلقتنا.. إيه هي الشروط اللي بتتمنيها في رئيس الجمهورية القادم؟
هأهأهأ يجي يأكل من سندوتشاتي أول ما يبقى رئيس جمهورية.
طب إيه رأيك بما انك ناشط سياسي في استبعاد الفلول من العمل السياسي؟
أنا ضد الموضوع ده خااااااااااااااااالص دي كارثة مش عليا بس لأ ده علي الشعب كله... أهييييييييييي إزاي يستبعدوا الفول أمال حنعمر الطاسه الصبح بأيه.. ما تردي يا اختى عليا ردي مالك مسهمه كده ؟ هو في حد يستغنى عن طبق الفول الصبح..(تصيح بهتاف) الشعب يريد زرع الفول.....!!!
ياست يا أم بليه انا اقصد الفلول مش الفول اللي حضرتك بتبعيه..
بقولك إيه بلاش فزلكه كدابه.. فلول جمع كلمة فول يا بتاعة المدارس..!!
النهاية
