الأحد ٨ كانون الثاني (يناير) ٢٠٠٦
بقلم أحمد رجب

الكلمة

الحب مش كلمة والعهد مش كلمة
فيه ناس كتير مجاريح وبيحلموا بكلمة
اتجمعوا بكلمة واتعشّموا بكلمة
واتحملوا التجريح من غير ولا كلمة
 
فيه كلمة تعلا بناس وكلمة تجرح ناس
وبنعمة الإحساس بنحس بالكلمة
والحب لما يهون يصبح دفين مسجون
يهرب كما المجنون مترجعوش كلمة
 
الكلمة زى الماس تسحر قلوب الناس
تسكر وزى الكاس بتدوخ الكلمة
تلمس فى بُعد الميل تهمس فى قلب الليل
تجرف وزى السيل ماتصدهوش كلمة
 

ارمي حمولك

 
ارمى حمولك وانسى الآه
وازرع خيرك واستناه
عمرك يوم ماح تحصد إلا
كل اللى انت زرعت نواه
واللى يفوتك بكرة يكون
لو حلمك عاصى ومجنون
بكرة ح ييجى اليوم وتحقق
اصعب حلم بتتمناه
غمض عينك وانسى الدنيا
اطول عمر بيبدأ ثانية
واياك تجرح يوم احساسك
وتعيش ليلة حزين جواه
واللى يفوتك بكرة يكون
لو حلمك عاصى ومجنون
بكرة ح ييجى اليوم وتحقق
اصعب حلم بتتمناه
 
ارسم حلمك زى الطير
وإياك تتعب م التفكير
انوى النيه وسلم حالك
بس النيه تكون لله
 

قرب يى

 
قرب لى يا حبيبى وخللى كل اللى جواك يوصللى
من امتى باستنى عيونك واتحمل اللى بيحصللى
كام مرة اقول بكرة تجينى وتمللّى من ضيك عينى
المح عيونك لو مرة تفضل فى عينى وتفضللى
 
شوف الهوى بيمر ازاى نفتكره رايح اتاريه جاى
فاكر هوانا وايامنا وفى باله احلامنا تملى
كام مرة اقول بكرة تجينى وتمللّى من ضيك عينى
المح عيونك لو مرة تفضل فى عينى وتفضللى
 
ياما رمانى عليك الشوق أجرى عليك وانت المحقوق
وانسى اللى فات واللى جرالى واتمنى ترجع وتميل لى
 

حبيبى

 
حبيبى لو الأيام بتتكلم ح تبكى حروفها ياحبيبى
حبيبى سايبنى لوحدى بتألم وليه ترضى بتعذيبى
ماكنا خلاص بقينا لبعض حبيبى خلفت ليه الوعد
وليه بَقّيت عليا البعد وليه تنسانى يا حبيبى
حبيبى
بتألم من غيرك جانبى وبالوم فى غيابك على قلبى
وعيونى اللى ما كدبتش ثوانى ولا دارت عنك يوم حبى
ماكنا خلاص بقينا لبعض حبيبى خلفت ليه الوعد
وليه بقيت عليا البعد وليه تنسانى يا حبيبى
حبيبى
ازاى بتفكر تنسانى وانت حياتى وكل كيانى
ازاى هانت فيك العشرة لما قبلت تعيشها عشانى

مشاركة منتدى

  • انا بصرااااااااااااااااااااااااااااااااااااااااااااااااااااااااحه ماقدر اقول غير انت انسان فنان تبي نصيحه مني ياليت تنزلوا في كتاب يصرااااااااحه انت كلامتك تجننننننننننننننننن

أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى