الثلاثاء ٢ أيلول (سبتمبر) ٢٠٠٨
بقلم أبو المجد حسين

العم أََحمس

ليل المواني كحَّل جفوني
أسفلت دا ولا شبه لوني
آدي اللي حبيتهم
بالحب عايروني
وآدي اللي غطيتهم برموشي عَّروني
ماشي وشايل همي علي راسي
صهد السكك طالع في أنفاسي
ياعم أحمس
مين كسر سيفي
مين اللي قدم لي جواز السفر
وبداله خد فاسي
مين اللي توهني ف بلاد الخلق
مين اللي خلاني اغير مبدئي
كل أما تدخل قدمي في مداسي
مين اللي زلزل راسي وأساسي
ياعم أحمس
شوف لي شي علي مقاسي
شيء يعدل المايل في إحساسي
أو شيء يضيع مني كل إحساسي
ياعم أحمس
آدي أوراقي
كل الوطن علي جثتي ماضي
هذا الوطن اللي أنا عشقته
ورضيت بهمه أهو بيه مش راضي
هذا الوطن ناره ماتحرق توب غير توبي
هذا الوطن ناسي ذنوب الخلق
لكن فاكر ذنوبي
هذا الوطن مغرم بالبحث عن عيبي
 
آه ياوطن ماتشبهو أوطان
ورق الخريطة بينفض الألوان
والليل بيدخل حاضن الرصفان
 
ياعم أحمس
ردني لداري
القهر حاني الظهر والساري
والسكة بتعاند تملِّي خطوة الغربا
ياعم أحمس
قول يعيش وطني
إياك تجمعها
وتقول أوطاني

أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى