الأربعاء ٢٢ آذار (مارس) ٢٠٠٦
بقلم نهاد بنعكيدا

حبك سلاطة

حبك سلاطة

وقلبك حكار

يتسلط فكل سهيه

فكل غمضه

فكل وقت

يتسيف يترهط

زغبية الربطه بيك

احلوه احدج منها مانفلت

انا حلاسة همك

انا خابية ماك ودمك

انا الحفره إيلا طحتي فيا

تتنشوى

انا الدار العامره

ايلا بغيتي تتخلوى

انا انت

وانت لفعه تتلوى

بين ايديك

تحت اضراسك

مقهوره نطلب الشرع

نترطى

بدفا يسيح كاسك

نجدب ، نتحير، نتسطى

بعد مني ،

اغبر ،

درق وجهك

سير ،

آجي ،

وعفاك.... ماتبطى

تمشي والنفخه سايقاكـ

شانت طالع لسما

شياطك انا شماه

وجوفك مايبردو غير الما

حبك لابسني

كاسيني من راسي لرجلي

مسلسلني مكتفني

ومتلف عقدة حبلي

ولبساني معاه التغوبيشه

ماعجبني حال

ماهاني لي بال

نتلحف بالصهده

ونتلثم بالتبوريشه

وقتما طحتي فالبال

إيلا شفتك نترفع

تقرق فمفاصلي الرعده

يتخلطو العرارم

فعظامي نتسلسع

قلبي عيوني كلها وفين صاده

الكف المرشومه قريتها

قالولي العمر الطويل والسعد معاه

وخطوط الزناتي هزيتها

قالولي انتي بريتو وهو جواك

البريه حلفتي حتى تقطع رجليها

والرقاص اللي بيناتنا خبارو جيحتيها

ودنيتي ضيقتيها بيا

شميتيها ولميتها

ولـثلث الخالي لحتيها

وهضرتي تلفتيها من عينيا

بصمقي رشمتها وبصلصالك محيتيها

الطريق بعيده

والحمل ثقيل

واجا ماوصلني


أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى