الأربعاء ٤ تشرين الثاني (نوفمبر) ٢٠١٥
بقلم منال درويش

حلمى مش ح يموت

الله
على نسمة هوا صافية
وشجرة توت .
ونهر الخير يحاوطنى
يداوى جرح كان مكبوت
ويفتح للنهار طاقة
ويبنى بيوت
تعيش بالحب مرتاحة
وتلقى الراحة ويا القوت
فتنزل م السما نجمة
تغنيلى باحلى صوت
وانا مشتاقة للفرحة
وكارهة في حشايا الموت
ونفسى التقى بكرة،
وح استناه منين ما يفوت
لان طريقنا كان واحد
ومش ممكن اقول يا سكوت
ويا غيمة معدية على ارضى
تندى ياقوت
يدَوبْ صخر ايامنا
ويبدر خير على الملكوت
يصحى النخوة فِ عروقنا
و ما يفضلشى ولا هلفوت
وأعاتب شجرة الصفصاف،
لو حنت لعشق طاغوت
ياكل ناسها وخير ناسها
وما ينبهاش غير سحتوت
وتفضل فِ الوجع عايشة
تقول نسكت على المسكوت
وانا ارفض وادعيلها
بعلو الصوت
يارب تفوقى يا غالية
دا الناحت وانا المنحوت
وانا الدايب فِ احزانك
وانا اللى عانى م الجبروت
ح تبقى زى ما انا عايز
وح نعدى الآسى ونفوت
على نسمة هوا صافية
ونقعد تحت شجرة توت !

أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى