من وحي النيل والنخيل

عنوانـــي

عنوان الشارع ما يتوِّهش

البيت معروف

شباك شقتنا بلون مخطوف

باب البيت منقوش بكفوف

من أيام العز الغابر

لما دبحنا

ف مره خروف...

يا اللي كلامي بيجرح نُبلك

أنا مستنظر سطوة غضبك

مش أكتر م اللي انا شُوفت

ح اشوف

يا أبي....

وانا باتولد قولتلي

ما تخافش م الضلمه

وابدر منين ما تروح

الحُب والرحمه

واعمل حساب ربنا

واختارنا أو هُمَّه

ضَفَّرت كل الوصايا

فطلعت واد شاعر

وكلامي بالحكمه

فقصيده بتحطني

وقصيده ترفعني

وعمري آخر المطاف

راح تقصفه كلمه.....

جلبي الوسيع

جَلبي الوسيع ضلّه

وانتي الربيع الجاي

عصفور وديع صلّى

لجل الجمال ع الناي

والعِشْج لو مِلّه

صوتك أدان جوّاي..

يا مصر يا عروجي

يا مركبي وموجي

ح تعَدِّي وتروجي

بـ كفِّي واللي معاي..

إحنا اللي خُدَّامك

طاجه لأيامك

وحجارة اهرامك

وطوفانك اللي جاي..

مصر من تاني

أنا جلد ضهري كتاب

والحبر من دمِّي

علي لوحي في الكُتَّاب

شَمَّرتِلِك كُميِّ

ولْحَد شعري ما شاب

فارد علي لِعْتاب

ضلعي اليمين فارس

ضلعي الشمال حارس

باقي الضلوع حُجَّاب..

عزيزة الأنساب

يا مصر يا طاهره

ياللي بتشغي رجال

كام دابوا من نظره

وأَسَرْهُم الموَّال

عشتيلنا يا خَضره

والغد جايلُه هلال

يا عزيزة الأنساب

يا ياقوته محروسه

وعليكي أزكَى تراب

داس فيه قَدَم موسي

وقابلتي بالترحاب

إبن البتول.. عيسى

عاشقين تراب قَدَمك

طلبَه وصنايعيه

شاوري نكون خَدَمِك

أُسْطَه وأفنديه..

غنَّى التاريخ نغمك

نخلك تَمَر فيَّا......

النيل والفرات

قسماً بهذا النيل

وبـ (طه) والتنزيل

وبـ (عيسى) والإنجيل

وبـ (موسى) والتوراةْ

وبـ (ربِّي) والسماوات

لتعيش عزيز يا (فرات)

في قلوبنا جيل ورا جيل..

وطنـي بَحِبَّك

وطني بحبك حُب صادق جد

حُبَّك مُنَزَّه مش حب واد تاجر

وطني بحبك مهما حيلي اتهد

غصبن عن الأجنبي العُصْبَجي الفاجر

وطني بحبك مهما المحن تشتد

نفسي أشوفك واد عَفْيَجي وقادر

يوم المواجهه ف أي عاركه تْسِد

قمحك كفايه ومصدرُه طاهر

إحفظ كرامتي بلاش إديك تتمد

للأمريكان لقرارنا يتصادر...

توبة

أنا ليه بيركبني الشيطان؟

وخط سيري ف إيدُه والفرمله

أنا زرعي ليه عطشان؟

ويوم حصادي السنبلة حنضله

أبيض يا ليل الطيبين لو جوع

و انا قلبي بايت بالشبع موجوع

قلبي في بُعدَك خلا

نادم و كُلِّي دموع

إجعل لي يا ذا الكرم

من درب المعاصي رجوع

عشمان يا سيدنا الحسين

تاخدني في رحابك

واكون من احبابك

عطشان يا سيدنا النبي

إرقينـي لــو رَقــوَه

عشان أكون أقوى

واعود من الذل نوبه

للتوبة والتقوى....