الخميس ٩ تموز (يوليو) ٢٠٢٠

وْدَنْ الِّليلْ

محمد حديش

مَنْ وْدَنْ اللِّيلْ سْمَعْتْ نَغْما
مْعَشْقا فْ ضُو زينْ الڭَمْرا
سْحَرْ صْفا ريحْها المْنَسْما
سْكَنْ تِهالْها جَدْباتْ مْحَيْرا
ؤُخَيَّطْ ضْلامْ الْخاطَرْ نَيْتي
يَتْماتْ حْروفْ جوفْ سَرِّي
ؤُتْحَيَّرْ ڭَلْبي شَطْناتْ تْوَلِّي
وَحْشاتْ فْ شونْ الڭَمْري
رْكَبْتْ نْبَهْوَنْ زينْ نْوارو
طاحْ لْتامْ الفْجَرْ بَسْحارو
ؤُمًنْ كُمْ النْهارْ بانْ رْسامو
ڭَعْڭَعْ بْهاهْ بارودْ مْكاحْلو
غَطَّاهْ مَسْكْ الْبالْ عَطْفاتْ
شْرَبْها غْرامْ لَبْغو شَخْداتْ
حَرْكاتْ سْواكَنْ زَهْري غْبارْ
فَيْقاتْ رْڭادْ الوَقْتْ جَرَّاتْ
ؤُشْطَحْ هْوى الڭَلْبْ إِتْفاجا
تْكَبْ كاسْ الشَّهْوى حَلْما
تَشْرَبْ مْرَحْرَحْ فْ الكَرْما
تْغَزَّلْ الْبوحْ غْرامْ الْكَلْما
سْمَعْها دَوَّاقْ غْنا الشًّرْقي
وَسَّدْ جْوانَحْ عْيوطْ الزَّعْري
راخي حْبالْ ميزانْ العَبْدي
مْسَرَّجْ مَحْرَكْ سَرْبَتْ البَرْڭي
نَجَّجْتْ مَنْ صُوفْةْ مَسْرارو
سَلْهامْ دْفا وَشْام فْ كْتافو
ضارَبْ لَوْتارْ ؤُمْْشَيَّرْ بَكْمامو
طْرَزْها الخاطَرْ مْزَيَّرْ الْجامو
هَلاَّتْ النَّفْسْ حْروفْها تْوَدَّنْ
تْفَيَّقْ تَكْسالْ خْميرْ تَّمْغاطْ
ؤُتْوَڭَّضْ مَحْراتْ الْهَمَّا إِفَلَّحْ
نافَضْ العْڭَزْ مْصَبَّحْ الرْباحْ

محمد حديش

أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

فيسبوك منبر حر للثقافة والفكر والأدب
تويتر منبر حر للثقافة والفكر والأدب
الأعلى