الخميس ٢٠ تشرين الثاني (نوفمبر) ٢٠٠٨
بقلم حسن خاطر

أجلوا الفرح

باراك حسين أوباما فاز بجدارة وكسب الرهان وأصبح رئيس أمريكا الرابع والأربعون

يا ترى حا يكون رئيس حقاني ومعتدل وألا حا تكون سياسته تخبط وجنون في جنون؟

الناس فرحانة يا ولداه عشـان بوش مشي وانـزاح وجاي واحـد غيره رئيس جديد

والله خوفي لينقلب الفرح أحزان وبدل ما كان العالم بيتضرب بعصاية .. يتضـرب في عهده بحـديد.

** ** **

لا تتغروا في أوباما وتفرحوا بالشكل الجنوني ده وتعلقوا الزينات ع البيوت وفي الشوارع

أجلوا الفرح وشوفوا الأول .. ها يكون هادئ وديع والا وحش مفترس وكمان مصـارع

والا ها يلخبط الأمور ويخلي كل حاجة أمر في أمر ويلغي الماضي والمستقبل والمضارع

يا خوفي أن أوباما يخذلنا ونقول دا بوش كان بالنسبة له ملاك .. ونظرنا طلع مخـادع.

** ** **

الشعوب العربية شعوب طيبة وبتحكم على الأمور بسرعة شديدة أصل قلبها أبيض ناصـع

وماشيه كده بالبركة وكأن ما فيش فيها واحد فاهم وطيب وعارف وبالأمور متنور وناصح

وكل الأشخاص عندها حلوين ما فيش رئيس ييجي وفي نظرها يكون وحش أو مش نافع

وبعدين بعد مدة تسألهم يقولوا لك .. أحنا عايشين بس حظنا في الهم بقى له سنين ناقع

** ** **

بوش مسك ... هللنا .. أوباما جاي ... رقصنا .. يا ترى القدر مخبي لنا إيه والا إيه ؟

كاتب لنا السعادة والا أوباما ها ييـجي ينفض وطنا ومــا يخليش فيـه دينار والا درهم والا جنيه؟

ويسيبنا نشق الجيوب ونلطم ونقول يا عالم يا ريتنا ما شفناه والا كان يوم تنصيبه جيه

يا رب أستر .. فالكيل طفح وأصبحنا مش ناقصين هم وغم وبصراحة رئيس أمريكا ما حدش يقـدر عليه.

** ** **

كفاكم رقص وفرح وتهليل وتطبيل لغاية ما تتضح يا ناس الأمور والغموض ينجلي وينزاح

وبعدين اعملوا اللي تعملوه حتى لو تقيموا في العالم كله الحفلات والسهرات والليالي الملاح

أمــا لو طلـع الرئيس مقلــب وشربناه .. علقوا ع البيوت وفي الشــوارع لا فتات "ممنوع الأفراح"

وساعتها رددوا جميـعا العوض على الله في أملنا الذي بنيناه ولحظــنا المهبــب .. انفــض وراح.


أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى