الجمعة ٤ تموز (يوليو) ٢٠١٤
بقلم بدعي محمد عبد الوهاب

أنا انسان من حقي أعيش

لو حيوان من حقي أعيش
واحلم إنِّي أكون إنساني
أنا مش راضي رئيسي يكون
واحد عامل فيها إسلامي
أو فرعون يُحكمني بسيفه
يُشخط يضرب يقتل تاني
أنا إنسان من حقي اعيش
نفسي أحس فـ يوم بكياني
نفسي أقول أنا مصري براحتي
وافدي بلادي بروحي ومالي
يعني البسمة حرام لو ترجع
شمس تنوَّر درب ولادي
يعني كلام الحق بِيوْجع
شوكة بِتقتِل نبض بلادي
...
أنا انسان من حقي يا ساده
لحظه فـ عمري تكون بسعاده
بكره الناس راح تكتب عنّي
عمري م أكون أنا عبد بياده
أوشيخون يضحك ويقولّي
إنُّو رسول الربِّ يا ساده
إن شريعة ربّي جمعها
فـ الدستور وكمان بـزياده
أبداً أبداً
أبداً أبداً
قرآن ربي عُمره م يظلم
عُمره م فَرَّق عيسى عن مسلم
أو كان هوّا سبب إفلاسنا
د احنا شعوب ملناش فـ تقدّم
أصل حكاية شعبي حزينة
فيها المسلم صار مِتْأسلم
أصل حكاية شعبي غريبة
نقطة دم يخاف يتكلِّم
يدفن راسه فـ قلب الصحرا
زيِّ نعامة تخاف تِتألِّم
لكن نبض العزَّة هـ يرجع
عمره فـ يوم مـ يموت وِيسلِّم
...
بكره هيجي تقولوا يا سادة
إن المصري د غير العادة
عمري م أكون أنا عبد بياده
أو شيخون يُخطب وِيقولِّي
إنُّو طبيب محتاج لعياده
محتاج كرسي العرش ف إيده
علشان تبقى الإيد جَوَّْاده
هه هه هه هه هه هه هه
هوَّ الدين محتاج يتقسِّم
أو يتفصِّل
علشان ينفع لينا يا ساده
يعني رسولنا
نزل برسالته لحد زمنا
وقال د خلاص
وقام المرسي نزل برسالته
بدار الأرقم برضه يا ناس
وعمي السيسي فرعون مصري
قال يا اخواني أنا ربِّ الناس
أقدر أحكم مين هيموت
واقدر أقتل كام برغوت
والله يا سيسي
انت في نظري رئيس هلفوت
...
أنا إنسان من حقي أعيش
نفسي أحس فـ يوم بكياني
نفسي أقول أنا مصري براحتي
وافدي بلادي بروحي ومالي
يعني البسمة حرام لو ترجع
شمس تنوَّر درب ولادي
يعني كلام الحق بِيوْجع
شوكة بتقتل نبض بلادي
....

أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى