الثلاثاء ٢٤ آذار (مارس) ٢٠٠٩
بقلم عبداللطيف مبارك

طالع ويّا نزيف الهم

طالع ويّا نزيف الهم

على كل وشوش الناس الضنك

متوارب زيّ بيبان الخوف

ومعدَى الجوف

أنات الجوع

أتباع من طوع

ويّا الصفقات المشبوهه

وكياس الدم

(2)

صرخه وطرحه ف جسم نحيل

ساقط تحت بيّاده وشومه

من غير قومه

ف أوده قديمه

يعنى .... الظلم

(3)

قلبى معلق بين شوارعها

فتارين شايلين أحلام مساكين

بخلاف من باعها

أبكى وجعها

وأدوب .....

ف الحلم

(4)

زمن السخره بيرجع تانى

والاقطاع والعيشه الطيشه

ثورة إيه دى اللى بتنسانى

ف توب جلابيتها ..

دوايه وريشه

لجل م أسجل ليها مبادئ

يكتب فوقها

تحفظ صم

(5)

حلم وزارى .. ف كوبايه فضه

حاطه يابطه .. يا طاسة الخضه

حادى يا بادى

و ضايعه بلادى

ف كيف وكم

(6)

لسه ختان الانثى محيّر

كل العمم اللى بتتصوّر

على فضاءيه ناءيه كليب

لسّه الخصى يدوب بيشب

جوّه الفكره اللى هتتعم

(7)

أمينه يا رزق

لّسه دموعك شايله الصدق

قالبه ميزان تراجيديا الفيلم

(8)

طالع ..

ويّا ..

نزيف

.. الهم


أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى