عرايـس مـاريـونت

مالك كده وخداك أفكار

ليه بتقييد جواك النار

ليه بقيت بتقضى سعاتك

حيرة وشوق

حاااول..

تطرد دى الحدوته

حاااول

توئد فكرة بتكبر

وإوعاك تدخل فى المجهول

تلقى الضلمه ماليه شطوطك

فكر وإرجع عيش دنياك

نفسى أعيش وياك

فى سلام

نفسى أحرر حيرة نفسك

عايز أجهض جوه دماغك

كل أجنة فكر تعذب

عايز أرمى جوه فى روحك

نبته جديدة

تحبل بيها

حلم حنيين وبيستحمل

كل مقاسى الكون حواليك

تولد فيك

طفل يعيش مش متأثر

دنيته لعبة

يلعب بيها

يزعل حبه لو تتكسر

طفل أليف

عايش فيك

حبه شقاوة وإياك يكبر

نفسى..

يجى يوم ترجع لى

نفسى..

تشيل ويايا همومى

سيب الكون ده

ربك خالقه

قدره هيمشى مهما تفكر

قول لى:

هتعمل ايه أفكارك

دا اللى بيحصل

كان متقدر

سوس وبينخر عصب الأمه

موت إنتا سوسة عضمك

دا اللى يشاءه المولى تعالى

مهما تعاند لازم يحصل

عايزك ياله ترجع ليه

نفسى..

تسيب الدنيا بحالها

ومتحكيشى أى حكايه

كل بلاوى الدنيا

فى دمى

وشى إتحول شاشة عرض

بحلق.. شوف

و إقرى شريط أخبارى الاحمر

تلقى إن إحنا

إتحولنا كده لعرايس

بتحركنا حبال مربوطة

نرقص حبه أو نتكلم

وأما تسيب إحبالنا

بنرجع

نسكت خااااالص

ولا نتحرك

حبة دمع يكحل روحك

ريح نفسك ليه بتفكر

إيه هينوبك

م الأفكار