ع المكتب بشرب فـي القهوة
وفــ إيدي مولع لسيجارتي
وبقلب ع الصور الحلوة
في سنيني الفايتة الخلصانة
وبقايا الشَعر المصبوغة
ونضارة وشي المنزوعة
وملامح شيبتي الدبلانة
واقف ومرايتي أنا قُدامي
بلمح في شبابي وأحلامي
فرحة ومرارة أيامي
والنظرة الصافية الغلبانة
وبرجًّع في شريط الماضي
وبفتش فـ القلب الفاضي
على ذكرى أكون بيها أنا راضي
فـي دفاتر شِعري الهلكانة
وبفكّر كام مرة لاعبت
الدُنيا وكام مرة حاربت
بحسب وأقول إني كسِبت
ألاقيها هي الكسبانة
أضايق وأقلع نضارتي
وأفكّر في طفولة جميلة
أيام ما لعِبت أنا مع جارتي
وأنا فاكر أوراق الزينة
أعيادنا وفاكر حكاوينا
فاكر ضحكتنا وأغانينا
وقت ما أطّير أنا طيارتي
دلوقتي العُمر خلاص عدى
وأنا قلبي مِن الشيب إتوضى
وشبابي مطوّلش السجدة
ويا قِبلة عُمري إتغيرتي
الاثنين ٢٨ كانون الأول (ديسمبر) ٢٠٠٩
