ضحكات خفيفة

ثلاثة صقور اتراهنوا على الصيد راح الأول ورجع في منقاره دم قليل... قال لزمايله شفتوا الشجرة اللى هناك دى؟ قالوا أيوه قالهم أنا اصطدت عندها أرنب...... راح الثاني ورجع في منقاره دم كثير قال شفتو الصخرة اللى هناك دى؟ قالوا أيوه قال اصطدت عندها غزال.... راح الثالث وهو أغبى واحد فيهم ورجع وكله دم قالهم شفتوا العمود اللى هناك ده؟ قالوا أيوه.. قال أنا ما شفتهوش.

حرامي خبطتة عربيه... قالوا له ما أخدتش النمرة ليه؟؟؟؟؟ قال لهم أصلها كانت ممسوكة بمسامير.

واحد غبى شاف قشرة موزه على الأرض فقال يييه هاتزحلق تانى!

واحده ست مسكت حرامى فى المطبخ، فقالت لابنها روح إنده ابوك من على القهوة.... جه ابوه، ولما فتح المطبخ لقي الحرامي صغيّر فقال له انت اسمك ايه؟ قالوا كريم، فقعد يضرب فيه لحد ما عجنه.... تاني يوم الست بتفتح باب المطبخ لقيت حرامي قالت لابنها روح يا وله نادي ابوك من على القهوة جه الراجل ولما دخل المطبخ لقي واحد طويل عريض....... بص لمراته وقال لها أمال فين كريم؟!!!

بطة راحت لبقال قالت له عندك سكر؟؟ قال لها لا.. راحت له تاني يوم قالت له عندك سكر؟؟ قال لها لأ، وعارفه لو جتيني تاني حدق رجليكي المفلطحه في الأرض... راحت له تاني وقالت له عندك مسامير؟؟ قال لها لأ .. قالت له طب عندك سكر.

ولد راح للبقال قال له عندك زبادى قال له أيوه قال له طب ادينى كيلو سكر، تانى يوم راح قال له عندك ملح قال له ايوه قال له طب ادينى علبة جبنة.. البقال زهق راح اشتكى لأبو الولد قال له ولا يهمك عندك عصاية قال له أيوه قال له طب اضربه بالقلم.

مدرس عربى دخل الفصل قال النهارده حصة إملاء.... يا أولاد اكتبوا ورايا: ذهب حسام إلى المصيف يوم الأربعاء.. راح ولد قام وقال لو سمحت يا أستاذ هو الاربعاء همزة على السطر ولاّ على الألف؟؟؟ الأستاذ قاله خلاص يا ابنى خليها الخميس.

واحدة حامل فى ثلاث توائم يوم الولادة الدكتور بيطلع العيل الأول لقاه نايم وساكت قعد يضريه على وشه حتى صرخ الطفل ركنه على جنب وطلع الطفل الثانى لقاه زى أخوه قعد يضربه لما فاق وركنه..... جه الدكتور يدور على الطفل الثالث مش لاقيه راح ماشى وقال للممرضة كملى لأنهم اثنين بس...... الممرضة جت تكمل لقت الطفل الثالث طالع برأسه بالراحة وبيسألها... هو الراجل اللى بيضرب العيال مشى ولا لسه.

واحد غبى عنده ارق ومش عارف ينام.... قال له صاحبه عندي لك طريقة للنوم مؤكدة... عد من واحد الى 500.......... فمكدبش خبر... وأول ما الدنيا ليلت راح للسرير وبدأ يعد.. واحد.. اثنين.. ولما وصـل للــــ 199... جـاه النوم … راح قـيام بسرعة وغـسـل وشه ورجــع للـسـريـر يـكـمـل الـعـد.

واحد راح حديقه الحيوان بص للنسر وقال نفسى اعرف الحكومة المصرية بتختم بيك إزاى!

مره واحد كان ماشي في الشارع بيقول حماتي حماتي.... واحد معدي بيقوله مالها حماتك؟؟ قال له الحمار رفسها ماتت، قال له كل الناس دي جاية تعزي في حماتك؟؟ قاله لأ دول جايين يشتروا الحمار.

واحد اشترى طبق دش، اكبر حجم وحطه فوق السطوح.. وعلشان خايف عليه من السرقه نزل قال للحته كلها إن فيه كلب كبير جدا فوق السطوح، فاتنين من أهل الحته خدهم الفضول.. فواحد بيقول للتاني تقدر تطلع تشوف الكلب قاله أيوه أقدر أنا مش بخاف... فطلع الراجل وشوية نزل يجري... صاحبه بيقوله شفت الكلب قاله لا شفت الطبق اللى بياكل فيه.

واحد غبى قوى حكموا عليه بالاعدام.. بعد ما علقوه فى المشنقه قعد يشاور ويخبط بأيده ورجليه ففكروه عاوز يقول حاجه مهمه.. ففكوه ونزلوه بسرعه...... فبص لهم وقال: ياجزم كنت هتخنق.

مره واحد تاجر كتاكيت ماشي بالعربيه وفيها كتاكيت وقفته لجنه تموين وقال له المفتش: الكتاكيت دي بتأكلهم ايه؟ رد عليه وقال له: ذرة يا بيه..... فقال له المفتش انتو ما بتفهموش حاجة الكتاكيت دي بتاكل علف........ وراح عامل له غرامة 1000 جنيه.... راح مشي التاجر بالعربيه وهو في الطريق وقفته لجنه تموين تاني وقال له المفتش انتي بتوكل الكتاكيت دي ايه قال له رد عليه بوكلهم علف يا بيه فقال له المفتش إنت حمار؟ دي بتاكل ذرة وعمل له له غرامه 1000 جنيه وبعد شويه وهو ماشي وقفته لجنه تموين تاني وقال له المفتش انتي بتوكل الكتاكيت دي ايه قال له يا بيه أنا كل يوم الصبح ادي كل كتكوت جنيه وهو ياكل اللي عايزه.

حرامى رجع البيت يوم عيد ميلاد مراته وايده فاضيه، مراته قالت له انت نسيتنى ولاّ إيييييييييييييييييييييييه؟ فين الهدية يا راجل؟؟... قال لها لأ أبدا.. بس أنا رحت للجواهرجى لقيته لسه فاتح.

واحد سفاح دخل شقة رجل قتل مراته والراجل ضحك قتل ابنه والراجل لسه بيضحك قتل بنته والرجال عمال يضحك قتل أبوه والراجل هيموت على نفسه من الضحك.. السفاح استغرب وسأله إنت بتضحك كدة ليه وأنا بقتل فى عيلتك؟ الراجل قال له وهو بيضحك اطلع من دول يا إبراهيم يا نصر.

مرة واحد غبى كان ماسك موبايل وبيتصل وعمال يقول دوري وانتى تلاقي .. دوري وانتى تلاقي... دوري وانتى تلاقي فكان جانبه واحده ست أخدت منه الموبايل وبتسمع لقت واحدة ست بتقول: الرقم الذي طلبته غير موجود.