لما البدر بيكمل نوره
أذكر اسمك اقول الله
لما الليل بيعدِّي بطوله
يِصَحِّي الفجر نقول الله
واما الشمس تدفِّي قلوبنا
تطوي البرد نقول الله
واما الطير ف. سمانا يعدِّي
تسمع تسابيحه لمولاه
واما الدنيا بتقسي علينا
مين راح نسأل غير الله
واما اتعب واغلب م. الحيره
بلقي هدايتي فْ. حضن الله
واما الخوف من بكره يا خدني
بيطمنِّي اسجد لله
واما امرض وطبيبي يفوتني
ملقاش غير اني ادعي الله
حتى الكافر يوم ما بيغرق
تلقاه قال من قلبه الله
ربك عالم بللي بيجرى
ولا ينساش عبد اترجاه
يللي تعبت كتير م. الشكوى
هيقوِّيك مين غير الله
يللى ضعفت وطالب النجده
هينجيك مين غير الله
يللى الظلم ضناك والقسوه
مالك ملجأ غير الله
لما الكرب يطولك فجأه
أسجد واطلب عفو الله
يوم ما تطيعه هتهدى وتبقى
راضي بكل قضاء الله
قرَّب منه بجد هتلقى
أجمل مللي بتتمنّاه
بس نعودله حقيقي هنملَى
كل قلوبنا بنور الله
يوم ما ندُوب مع أجمل كلمه
كل الكون بيقولها الله
ترسى شراعنا ف. يوم ما هيرضى
وكفايه انِّنا نرضي الله
لما البدر بيكمل نوره
أذكر اسمك اقول الله
الثلاثاء ٢٤ كانون الثاني (يناير) ٢٠١٢
