يعني إنتي هيك وحدك
دون عن كل الصباي
صايرا هالقد حلوي؟
وللا عيوني شايفينك هيك
وللا الله اللي سكب هالقد
من بعدْ مِنِّكْ كسَّر القالب على صخرا
وقعد وارتاح
وسكَّر الجَني عليكي وضيَّع المفتاح
لك حلوي إنتي متل بسمي
متل نسمي
متل فَيْقا عالصبح بكّير
من قبل ماتِصْحا عصافير الّكْروم
وتْقوم تاتِنْقش الحنّا عإيديكي
وتِنْزِلْ ملايكة السما تصبِّح عليكي
وتحسد النوم
كيف بيجيب النعس
وبْحِجْتو بيفوت يتْخَبّا بْعَيْنيكي
هالعيون اللي متل لوز الجرد
وبْكل نظرا فيهن الدنيا بْتِهْدينا وعد
وبْتِجْلي لهموم ضحكْتك لو تضحكي
والشوف مومتل الحكي
شَعْرِكْ ليالي مشَّطا كانون
والمشط مشوار الحبايب والليالي مِقِمْرا
وعمْرا الدنيا من بعد شم الجدايل
ألف عمرا
يم الخصر مايل على سكْبِت ورد
ليش نتعب ليش نشقا
ليش نحْيي بعدك عْراس البلد
ياحلوي ياللي بيحلاها مانوجد
ولا لسٌا بعْد بْينْوجد
الاثنين ٨ آذار (مارس) ٢٠١٠
